ఆడది ... ఒక ఆదిశక్తి ...!!!

‘ఆడది ఆదిశక్తి’

ఈ సృష్టిలో ఆది శక్తి ఆడది

ఎంతటి విజ్ఞానం అభివృద్ధి చెందినా

ఏ యంత్రమూ  మనిషికి జన్మనివ్వలేదు

ఒక్క స్త్రీ మూర్తి తప్ప ...

అటువంటి మగువకు జన్మను ఇవ్వడానికి ఈ సమాజం

ఎందుకు భయపడుతుంది ?

ఎవరో ఒక పండితుడు చెప్పాడు

కొడుకు పుడితే పున్నామ  నరకం తప్పుతుందని

అది ఒక  తరతరాల నమ్మకం ... !

ఎక్కడో ఒక అత్తగారు చెప్పింది  కుతురుపుడితే

అష్ట దరిద్రాలు అంటుకుంటాయని

 ఇదేమి విడ్డూరం...

మరి ఆమె ఒక ఆడదేనని మరచిపాయిందేమో!

 విజ్ఞానం మనిషి ఉన్నతికి ఉపయోగపడాలి

మరి అదే విజ్ఞానం  మూఢ నమ్మకానికి తోడై

స్కానింగ్ యంత్ర రూపంలో  పుట్టే ఆడ శిశువులను

ముందే  కనిపెట్టి చంపేస్తుంటే

మానవత్వం విలువ రూపాయి నోటు ముందు ఏ పాటిదని చెప్పాలి.

పొద్దు పొడిస్తే ధనలక్ష్మి చిత్ర పటాన్ని

ఒక్క క్షణం వీడని ఒక వ్యాపారి

తన ఇంట జన్మించబోయే మరో స్త్రీ లక్ష్మిని తిరస్కరిస్తాడెందుకో ?

ఇదే పోకడ గత చరిత్రలో ఉండి వుంటే...

ఒక ‘ఇందిర’ ఏవత్ భారతాన్ని పాలించి ఉండేదా ?

ఒక ‘కల్పన’ విశ్వ వీధులలో పయనించి విశ్వ కీర్తిని మనకు మిగిల్చేదా ?

విశ్వ మాత ‘మదర్ థెరీసా’ సేవామృతం ఈ మానవాళికి దక్కేదా ?

ఒక తల్లిగా , భార్యగా , కూతురుగా తన జీవితాన్ని  త్యాగం చేయడంలో

స్త్రీ మూర్తికి సాటి ఎవరు నిలువగలరు ?

కష్టాల కోసమేనా పాపం మగువ జీవితం ?

కన్నీటి కోసమేనా మరి ఆమె జననం ?

ఒకప్పుడు బాల్య వివాహాలు , సతీ సహగమనాలు ,

 పరదా ఆచారాలు ఆమె పాలిట ఉక్కు సంకెళ్ళు

నేడు జన్మించే హక్కే కరువై

మాత్రు గర్భమే సమాధిగా చేసుకున్న ఆమెకు న్యాయం చేసేది ఎవరు ?

అన్నింటా పురుషునితో పోటీ పడగల శక్తి

ఈ ధరణి పై జన్మించి జీవించే హక్కు ,

నిండు జగతిలో మాత్రు సుమమై పరిమళించే శక్తి

ఆ స్త్రిమూర్తికి గాక ఎవరికి  ఉంటాయి  ...!!!

శ్రీ సాయి దాస్ 

(సూర్య చవాకుల)